သိသင့်သိထိုက်သော အရာဌာနကို မသိတတ်သော, မသိအောင် ဖုံးလွှမ်းပိတ်ကာ ထားတတ်သော တရားသည် “အဝိဇ္ဇာ” မည်၏၊ ထို အဝိဇ္ဇာမည်သော မောဟသည် သစ္စာ ၄-ပါးကိုလည်း မသိအောင် ဖုံးလွှမ်းတတ်သည်၊ အတိတ်က ဖြစ်ခဲ့သော ခန္ဓာ, အာယတန, ဓာတ်အဖို့အစု၊ အနာဂတ်၌ဖြစ်မည့် ခန္ဓာ, အာယတန, ဓာတ်အဖို့ အစု၊ အတိတ်က ဖြစ်ခဲ့သော ခန္ဓာ, အာယတန, ဓာတ်အဖို့အစုနှင့် အနာဂတ်၌ဖြစ်မည့် ခန္ဓာ, အာယတန, ဓာတ်အဖို့၊ ဤတရား ၃-မျိုးကိုလည်း မသိအောင် ဖုံးလွှမ်းပိတ်ကာ ထားတတ်သည်၊ ပဋိစ္စသမုပ္ပါဒ်တရားသဘောကိုလည်း မသိအောင် ဖုံးလွှမ်းပိတ်ကာ ထားတတ်သည်။ ဤ ၈-ဌာနတို့နှင့် စပ်လျဉ်း၍ မသိမြင်ခြင်းမျိုးကိုသာ “အဝိဇ္ဇာ”ဟု ခေါ်ရသည်၊ ဉာဏ်ကြီးရှင်တို့၏ အရာဖြစ်သော အချက်အလက်များကို ပိုင်ပိုင်နိုင်နိုင် မသိခြင်းမှာ “အဝိဇ္ဇာ” မဟုတ်ပါ။
အကုသိုလ်ကံ ၃ ပါး
၁။ အကုသိုလ်ကာယကံ၊ ၂။ အကုသိုလ်ဝစီကံ၊ ၃။ အကုသိုလ်မနောကံ။